دورة عبدالله المخيزيم في جامعة الكويت

[المضاربة]

السلام عليكم

ودي اسئلكم اخواني

منو فيكم دخل دورة دكتور عبدالله المخيزيم

ألي يشرح فيها البورصة الكويتية ؟

تنصحوني ادش لها ؟

فيها منها فايدة ؟؟

او انها كلام عام ؟؟

ودي اعرف عنها كل شي

ومتى في دورة قادمة ؟؟

[التكانة]

السلام عليكم ....

الدورة انا داشها مو شي والله وفايدتها قليلة جدا وماتسوى سعر 50 دينار تسوى 20 دينار فقط لأن عبدالله المخيزيم ماعنده خبرة بالسوق الكويتي وكل شغله بالامريكي والامريكي يختلف عن الكويتي وخلفيته عن البورصة الكويتية بسيطة جدا جدا جدا نصيحة لا تدش هالدورة دش غيرها .

[المضاربة]

بس يقولون أنه يشرح التداول الالكتروني ويشرح في اشياء

يديدة

لانه اهو الوحيد الدكتور عبدالله المخيزيم الي يشرح هالامور

هل في دكتور ثاني يشرح السوق الكويتي أحسن من عبدالله المخيزيم ؟

دلوني عليه وشنو يعطي ويشرح بالضبط لوسمحتوا

[المضاربة]

الي يعرف دكتور ثاني غير عبدالله المخيزيم يعلمني عليه

لاني توني قريت بالجريدة انه في دورة بالجامعة الاسبوع الياي

بس مو كاتبين منو يدرسها دكتور عبدالله او غيره ؟؟

[siri]

التكانة
فهمن شنو المواضيع الذي يدرسها وانا اسمع ناس وايد يتكلمون عنه

[التكانة]

السلام عليكم

شوف الله يسلمك اول شي نبذه عن البورصة وبعدين عن الاسهم وشنو معنى السهم ومن هالقبيل وبعدين برنامج لتحليل الاسهم وبعدين تعليم على برنامج الاوسط برو ولكن معلوماته بسيطة وخبرته مو ذاك الزود وانا ما اقول هذا طعنا فيه لا والله ولكن كوني مجرب هذي الدورة فأحب أرشدكم انكم تسألون عن واحد غيره وأظن في واحدد ولد الصقر يمدحونه .

[المضاربة]

وصلتني المعلومات الي بقولها

دكتور عبدالله المخيزيم اول شي اسمه عبدالرحمن مو عبدالله

وانا اسفة للدكتور لاني فعلا ماكنت عارفه اسمه الحقيقي

ثانيا الدكتور عبدالرحمن المخيزيم محاسب وخلفيات كلها في المحاسبة

وانه يعطي في الدورة اشياء وايدة مفيدة عن شلون تشوف القوائم المحاسبية

وبعدين تقرر تشتري او تبيع مع شرح لنظام الاوسط برو


المعلومة الخطيرة انه المحاضر الثاني اسمه فهد الصقر وهو أقدم من الدكتور
المخيزيم

والصقر عنده معهد واهو داش الجامعة علشان يروج حق معهده

الدورة الي يعطيها الصقر فيها مثل ماوصلني الخبر أنه يغطي موضوعات
مثل شلون تقرا القيمة الاسمية والدفترية وشلون تعرف اسباب نزول سهم
لو استقال عضو مجلس ادارة يقول الصقر هذا مؤثر راح يطيح السهم ولو
عينوا واحد زين في مجلس الادارة راح يصعد السهم

انا محتار في اي دورة ادخل الحين

لكني راح اسوي الشي الي في بالي وهو

راح ادخل عند الصقر وعند المخيزيم وبعدها اقولكم شنو رايي

شنو رايكم بفكرتي ؟

[ابو مشاري]

عين الصواب

لاني من كلامك افهم انهم مكملين لبعض

وكل واحد فيهم متخصص بشغله معينه او بمعنى ثاني خبره بشي معين

المخيزيم بالمحاسبيات والصقر بالامور السلبيه والايجابيه للسهم

اهم شي الاستفاده لان بالاول والاخير يصب بصالحك وبرزقك

وبالتوفيق للجميع

[boalons]

يمدحون دوره ابراهيم الخلف

لي قريب داخل الدوره بس مادري متى ببيت لوذان يقول شي رائع

[التكانة]

السلام عليكم ...

اذكر لما كنت بالدورة عند المحاسب المخيزيم كان معانا واحد الله يذكره بالخير ماستفاد ولا شي حتى اغلب الحضور كانو متذمرين وانتو كيفكم انا قاعد انصح وانتو حرّين بالاختيار

[siri]

ابو سلطان

انا سمعت نفس الكلام الذي ذكرته
ان كلا الدكتورين يتكلمون عن السوق الكويتي من حهة مختلفه عن الاخر
وانصح اللي يبي ياخذ دوره عن البورصة لابد ان يتعلم علم المال والاستثمار ان امكن فيؤخذ دورات بكل العلوم ان امكن مثل التداول بالسوق الامريكي والتداول بالعملات العالمية
لانها كل الاساسيات تقريبا واحده فيجب ان ازود نفسي بهذه العلوم حتى اسنطيع ان ابحث عن الربح .

[المضاربة]

السلام عليكم

انا ما سمعت عن محاضر اسمه دكتور ابراهيم خلف

هذا الدكتور اكيد يدرس برة الجامعة ؟

ابراهيم خلف شنو مضمون دورته ؟ وشلون يشرح ؟؟

انا قلت بدش عند الصقر والمخيزيم كلهم علشان اتصير

الاستفادة استفادتين ، هالمرة راح ادخل دورة ثالثة بعد ;)

[يورو]

في دورة تقام في بيت لوذان المحضر مدير محفظة في السوق الكويتي وبس.

[المضاربة]

السلام عليكم

اخوي يورو منو هالمحاضر ؟ شنو عنده محتوى ؟

مدير محفظة ؟ اكو احد يفضح عمره ويقولكم اني مدير محفظة

جان زين كل الناس تقول شنو عندها وشنو تسوي :)

ما اعرفه ولا عمري سمعت عن هالمحاضر

بس انا حاس انه مو مدير محفظة ولا هم يحزنون

مجرد محاضر حاله حال الصقر والمخيزيم

مشكور على هالمعلومة بس قولنا شلونه ؟ يسوى ندش عنده ؟

وجم دورته ؟

[الحرامي]

مهندس شارتات وليس دكتور دورتة عن الشارتات وقيمة الدورة 50 د.ك ومهنس التداول الإلكتروني الآجل والكسور والسوق العادي بعدين مشكلته انه ما عندة مدكرات للمراجعة يعني اللة يعينك على الكتابة والرسومات الشارتات ويمكن ما تلحق معاه . ويدعي انة مدير محفضة وله خبرة 9 سنوات .
بس اللي لاحضتة منه انه مايل للامريكي اكثر لانة شكلة الكويتي معقدة شوي ههههههههه :D

[يورو]

دورة بيت لوذان انا حاليآ ماخذهة وايد زينة يا جماعة شي واقعي مو بس نظري اما الأسم اسمحولي ,الي يبي يسأل يروح باجر الساغة 5:30

[siri]

وايد الكلام على الدورات

ولكن نسينه ان نتسائل عن شي وايد مهم ....

ان نعرف عن طبيعة عمل المحاظر هل يعمل في نفس المجال وخبراته في مجال السوق او مختلفه

وكذالك هل المحاظر يحتاج خبر في مجال التدريس او مجرد محاظر

[المضاربة]

السلام عليكم

اخوي يورو مممكن تقول لنا شنو اهي موضوعات الدورة

وهل انت شايف انه فيها استفادة اكثر من دورة الصقر والمخيزيم ؟

لأن بصراحة وصلني خبر من اكثر من واحد انه دورة المخيزيم ماتسوى

وان الشرح الي فيها بسيط جدا ومعلوماته عن السوق الكويتي ماتتعدى

جم معلومة من موقع الاوسط

عطني الله يخليك جم معلومة عن دورة بيت لوذان علشان ادش لها

وجم دورة عندهم ؟ يعني في دورة اولى ودورة ثانية متقدمة ؟؟ وبجم ؟؟

[المستشار]

بسم الله بادئ ذي بدء

بالنسبة للآراء المتضاربة حول طبيعة مقدمي هذه الدورات آنه و بأمانة شديدة و يشهد الله لا ابتقي الدعاية لشخص معين ولا اقصد الاسائة ولا تربطني بأي من هولاء اي صلة قرابة لا من بعيد ولا من قريب ولكن اقول ما رايت و ما سمعت...


1. الاستاذ / ابراهيم خلف ابتدئ التدريب من عام 1999 في امريكا و كان يدرب هناك في احد المعاهد الخاصة لانه خريج امريكا فكان يذهب هناك و يدرب في احد المعاه كما ذكرت.
ابتدئ التدريب في الكويت من عام 2001 و قام بتدريب فئة لا باس بها من المتداولين و انا رأيت بام عيني دكاترة من جامعة الكويت كانوا يحضرون عند ابراهيم خلف....بل و حتى بعض شركات الاستثمار قامت بارسال بعض موظفيها للتدريب على يد ابراهيم خلف لأن أحد اخواني كان حاضر الدوره هاذي.

اما عن خبرة ابراهيم خلف فكما اسلفت ..قرأت سيرته الذاتية في الرأي العام و هي كالتالي من خلال لقلء صحفي..
1. المدير العام والرئيس التنفيذي لشركة دار التداول للاستشارات المالية.
2. مدير احد الصناديق الاستثمارية في شركة استثمارية اسلامية (سابقا)
3. مدير محافظ الستثمارية وعقارية (حاليا)

درب في البحرين و قطر و الان في الكويت و هو مستمر في تقديم اكثر من دورة...
1.دورة التداول.
2.دورة التحليل الفني و قرائة الرسومات البيانية.
3.دورة ادارة المحافظ الاستثمارية (قريبا كما سمعت)


و اكرر بان الله وحده اعلم بما في سريرتي و لا اقصد الاسائة او الدعاية لاحد ولكن للاستفاده العامة ..
على فكرة هناك دورة يقدمها ابراهيم خلف يوم السبت في بيت لوذان اذا احد يبي ارقامهم..

2491967 - 2491968 - 9134544

والله وحده من وراء القصد

[المضاربة]

السلام عليكم

اخوي المستشار شلونك ومشكور على هالمعلومات

بس مو جنك قلت اشياء وايدة مالها شغل بموضوع المخيزيم :)

المنافسة بين كل محاظر حلوة وما يمنع المنافسة بس اذا صار في السالفة
سرقة نوت ومن دون اذن ، وهذا واحد يقول ان المخيزيم ما تستاهل دورته
والصقر دورته مسروقة ، جذي احنا ضعنا بالطوشة

انا راح اتصل بالارقام وراح اجرب كل واحد وماراح اسمع كلام هذا الي يقول
حجي وهذاك الي يقول حجي ثاني

وراح اخاذ دورة عند الصقر وعند المخيزيم وعند ابراهيم خلف


بس سؤالي عن دورة ابراهيم خلف شنو محتوى الدورة الاولى والثانية ؟
ومتى يدرس الدورة الثالثة الي مالت المحافظ ؟؟
لاني ابي اعرف شلون يفكرون هالمحافظ والصناديق

[ابو مشاري]

اخواني الاعزاء


المستشار والمضاربه

نحن هنا للاستفاده وليس التجريح

ولقد عملت بعد اذنكم تعديل على المشاركه وحذفت التجريح الذي لا دليل لنا به ولا نريد الغيبه لاحد بسوء

وارجو معذرتي على التدخل

وبالتوفيق للجميع

[المستشار]

بسم الله بادئ ذي بدء

الاخت المضاربة انه نقلت النعلومات الي اعرفها و في بداية حديثي بينت هالشي..

اما عن موضوع الصقر فآنه دخلت عنده دوره و هو فعلا يملك معهد ولكن ليس له علاقه بالاسهم و هو يعمل في الادارة العامة للاطفاء((( انه مخلص عند معاملة قبل شهر))) :)
أما عن جنسية ابراهيم خلف....فهاذي ثالث جنسية اسمعها عنه..

واحد يقول بدون و واحد يقول سعودي و واحديقول بدون عالعموم انه ما فكرت اناسبه :) انه دخلت عنده دوره

وبالتوفيق يالمضاربة

[المضاربة]

صباح الخير والسلام عليكم كلكم

بقول حق المستشار شي ولايزعل مني :)

تصدق اني احس انك انت ابراهيم خلف ؟

من اسلوبك ودفاعك عنه جن تقوول لنا انك انت الاستاذ او
الدكتور ابراهيم خلف

عموما اذا انت فهذا شي حلو وطيب انك تكون معانا علشان نستفيد
منك ونتعلم منك لانك عندك خبرة

وثاني شي انا مالي شغل بالصقر او بالمخيزيم وين يشتغلون
وماادري ليش انت مصر على انه الصقر ماله شغل بالبورصة
عيل شلون يعطي دورة عنها ؟؟ وتوني قاعد اشوف صورته في
الجريدة وحاطين خبر انه معطي دورة حق جمعية المعلمين

وعلى فكرة طلع اسمه مهند الصقر مو فهد الصقر جذي مكتوب بالجريدة

عموما ماجاوبتني شنو محتوى الدورة الاولى والثانية

انا ابي المحتوى ؟

ومتى بيعطي دورة ادارة المحافظ لانها وايد مهمة هذي بعد

ومشكورين وانا اسف اذا في غلط بسطوري يامراقب ويامستشار

[البومه]

الاستاذ
مهند الصقر يعمل بالهيئه العامه للتجاره والصناعه ولا يعمل اطفائى فكفى تنزيل من قيمه الريال

[المضاربة]

السلام عليكم

بكتب حق البومة

اول شي انا مانزلت من قيمة لا الدكتور عبدالله المخيزيم ولا الدكتور فهد أو مهند
الصقر ولا الدكتور خلف ابراهيم

انا قلت أني قريت اسم الدكتور فهد بالجريدة اليوم مكتوب مهند الصقر بس

وثاني شي ماكو اسم هيئة بالكويت اسمها الهيئة العامة للتجارة والصناعة

عندنا الهيئة العامة للصناعة

يمكن هذا الي تقصده

[البومه]

يا اخ مضاربه ما قصدتك انت انت بالعكس قلت مايهمك عملهم

[أبو محسن]

(البومه)

واذا هو يعمل في الاطفاء يعني قيمة الرجال نازلة
افهم من ذلك ان اي واحد يعمل في الاطفاء قيمتة انزل من الي يعمل في بالهيئه العامه للتجاره والصناعه

[ابو مشاري]

اتمنى من الاخوان التدقيق باختيار الكلمات

وان يتوقفوا عن الكلام الجارح والذي لا يستفاد منه

والا فاني ساضطر لاغلاق الموضوع

وليس من المعقول ان امشي واعدل بالكلمات التي استغرب انها تخرج من اناس لهم كل ثقه وتقدير واحترام عندنا


وشكرا

[المضاربة]

السلام عليكم

انا اسف جدا وحقك علي يامشرف المنتدى بو سلطان

انا الي فتحت الموضوع واذا تبيني اتوقف عن الكتابة اهني
انا حاضر

ارجوا ان لايفهمني احد بشكل ثاني

انا كان هدفي من الاساس هو البحث عن المعلومات الجيدة
وماكان هدفي ان اجرح احد ولله الحمد ماجرحت احد

وخلاص ماراح ارجع اكتب في هذا المووضوع

وانا راح ادش ثلاث دورات عند كل واحد منهم وراح
انا اقرر ايهم احسن من الثاني بالمعلومة ويمكن كلهم
ماعليهم اي كلام