حكاية جحا مع نكار الخير

[دشتي البورصه]

واحد النّهار جار جحا جا لعنده وقال له: يا سي يَحْيَى دبّر عليَّ واش نعمل باش نصوّر الدّراهم. قال له: اشرِ الفحم وخلِّه في المخزن حتَّى للمشتَى وكبّ عليه الما ساعة على ساعة. خذا رايه وشرَى بالزّاف الفحم وخزنه في حانوت ورشّه كُلّ يوم بالمال وكي جا المشتَى اغلاظ الفحم واثقال وباعه وربح فيه دراهم كبار. رجع عند جحا وقال له: يعطيك الصّحّة يا سي يَحيَى راني تبعْت رايك وربحْت. ما ذا بِيَ تزيد تدبّر عليًّ. قال له جحا: اشرِ الزّرع واخزنه حتّى للشّتا يغلاظ بالنّدا وتربح فيه في الكيل. هَكذاك عمل وزاد صوّر بالزّاف الدّراهم حتّى رجع مولَى مال كبير. لاكن كان هَذا الرَّجل نكّار الخير وفنطازي. رجع يتكبّر علَى جحا ما يزوره ما يسقصي عليه ما يتفكّره بشي مكافية. ومعٰ هَذا الشّي كان طمّاع ويحبّ يزيد يربح فوق ما كان يكسب. جا واحد النّهار عند جحا وقال له: يا جحا دبارتك فيها الفايدة زِد دبّر عليَّ فكرة مربوحة. فرح جحا وقال في نفسه: هَذا طيّحه ربّي في يدّي ذرْوَك نفهّمه في روحه. قال له: اشرِ البصل بجميع ما تكسب واخزنه في حانوت وكُلّ يوم كبّ عليه الما حتّى للمشتَى. ذاك الوقت يغلاظ ويثقال وتبيعه بفايدة كبيرة. هَكْذاك عمل لاكن كي جا يجبد البصل باش يبيعه يصيبه خمج ونوّض الاوراق. راح لجحا وقال له: ما شي حقّ عليك يا سيدي تغرّ لي وترميني في الخسارة. قال له جحا: كي سمّيتني سي يَحْيَى احييتك وربّحتك. منين ولّيت تقول لي جحا جحّيتك باش تعرف بالخير والاِحسان.