الى اصدقائي اعضاء هذا المنتدي لدي خمسة اسألة ابحث عن الجواب

[(المستثمر)]

السلام عليك ورحمة الله وبركاتة
اشكل علي بعض هذه الكلمات ولا استطيع معرفتها لقلة معرفتي فالسوق الاسهم
1- تجزئة السهم وما الفائده منه وهل اشتري قبل التجزئه او بعدها وهل مفرحه لهالدرجه
2- اسمع في زيادة راس المال 200 % او 100 % وهل زيادة راس المال يعني الشركة خسرانه بل بعضهم يقول مبروك زيادة راس المال
3- اقراء عنوان يقول واحد لصاحبه في بعض المنتديات (الدعم والقاومه +التجميع والتصريق الاحد 18/12 ) بهذه العباره ويقول له صاحبه شكرا والثاني يدعوله وانا مو فاهم ماقال له شي واضح ويردون عليه ناس كثيرين استغربة من الكلمتان
4- القيمة السهميه 1 او 10 ما الفرق
5- السهم له قاعده سعرية ما معنا ه
علما انني دخلت السوق دبي بالاخص في بنك دبي الاسلامي ارجوا الرد الفصل لوسمحة لاني لا استطيع معرفتها والله يجزيك خيرا وزوجتا بكرا اقل امين

[المسبار]

السلام عليكم

اخي الكريم ساجاوبك باللي متأكد منه 100% فقط.
1. تجزئة السهم، ما اقدر افيدك فيه حيل، ولكن بالغالب السهم اللي يتجزء يكون سعره غالي حيل والحركه عليه خفيفه، ولكن عند تجزيئه تزيد كمية الاسهم ويقل سعرها فتزيد عليه الحركه.
2. زيادة راس المال:

تخيل شركة مثل شركة المخازن كان راس مالها 40 مليون دينار تقريبا في سنة 2004، وارباحها جيده جدا، في سنة 2005 صار عندها مشاريع وتوسعات فاحتاجت فلوس عشان تمول التوسعات، راحت زادت راس المال 45+16.6 = 61% تقريبا.
وزعت اسهم منحه لزيادة راس المال على كل 1000 سهم مملوك عطو المالك زيادة 450 سهم بلاش، يعني بدال لا يعطونه ارباح فلوس، عطوه اسهم، وبما ان سهم المخازن غالي بحدود 3 دنانير، يكون الربح وفير، وباعو للملاك على كل 1000 سهم 166 سهم تقريبا بسعر 2250، وسعر السوق قلنا بحدود 3 دنانير يعني هم ربح على كل سهم بحدود 500 الى 750 فلس.
طبعا بعد زيادة راس المال مباشرة نزل سعر المخازن من 6800 الى 4700 تقريبا، لان السعر الجديد بعد زيادة راس المال = السعر القديم ÷ (1+زيادة راس المال).
اذا الشركه فيها توسعات ومشاريع ومستقبلها واضح، زيادة راس المال شي حلو، ولكن معظم الشركات التعبانه تنتهج اسلوب رفع راس المال، وتخسر العالم للاسف.
3. الدعم والمقاومه:
الدعم هو سعر للسهم يكون مغري للشراء، يشوفون الناس رخيص فيروحون يشترون السهم، ولما يشترون السهم يزيد الطلب وبالعادة يرتفع من هالسعر.
المقاومه هي عكس الدعم، بحيث يكون ملاك السهم يشوفون سعره حلو ومربح ويبيعون على هالسعر، ومع زيادة البيع يقل الطلب وينزل السعر، طبعا في تحليل فني ممكن تتبع الاخوان المحللين الفنيين فيه، وهم يحددون نقاط الدعم والمقاومه.
التصريف يكون في سعر غالي السهم ما يستاهله، ويقومون كبار المضاربين بعمل عمليات وهميه يخلون الناس تشتري ويصرفون السهم عليهم بالغالي.
التجميع يكون السهم اقل من سعره العادل ورخيص جدا، يروحون كبار المضاربين ويخرعون الصغار ويبيعون كميات عاليه او يعرضون كميات كبيره عشان يخلون الفقارى المساكين يخافون ويبيعون اسهمهم برخيص والكبار يجمعون هالاسهم.
4. القيمه الاسميه يمكن تقصد، القيمه الاسميه هو سعر السهم عند الاكتتاب فيه، وبالكويت بالعاده يكون 100 فلس، وتشوف الشركات تقول بتوزع 100% من الارباح مثلا، فهذي معناها بيوزعون 100 فلس عن كل سهم.
5. اما ادري شنو المقصود، اول مره اسمع هالتعريف.

اتمنى من الله اني قدرت افيدك.

والله يوفقك

[ضربة حظ]

وانا بعد عندي سؤال اشلون تحسب سعر السهم العادل من ارباحه؟؟؟
بعض الاخوان يضربووون في 10 شنو السبب ؟؟؟

[المسبار]

وانا بعد عندي سؤال اشلون تحسب سعر السهم العادل من ارباحه؟؟؟
بعض الاخوان يضربووون في 10 شنو السبب ؟؟؟

ادري انه مدخل للسؤال اياه، بس هم ماني قايل :)

السعر العادل بالنسبه لي هو مسمى يتغير من جهه الى اخرى، وهناك اشياء كثيره تدخل به، على سبيل المثال:
1. نسبة التوزيعات: لما تجي شركة الهواتف مثلا وسعرها 3 دنانير وتوزع ارباح 300 فلس، فتكون نسبة التوزيع 10%، ولما تجي تشوف البنوك جم يعطون على الودائع ؟؟؟ مثلا يعطون 6% فهني يكون شراء سهم الهواتف في هذا السعر افضل من وضع الاموال كوديعه.
يعني لازم يكون نسبة التوزيع (قيمة التوزيع تقسيم سعر السهم) يساوي او اكبر من قيمة عوائد الودائع في البنوك.
2. معامل الربحيه: معامل الربحيه هو تقسيم سعر السهم على الربحيه، وله ارقام من 5 الى 30 او اكثر من ال 30 قليلا، في ناس يحسبونه في طريقة اضمن وهو قسمة سعر السهم على الارباح المحققه فقط (طبعا على اخر 12 شهر).
ما ادري شلون ارقام معامل الربحيه طالعه، بس محسوب فيها نسب نمو الشركات فتجد ان البنوك وهي اكثر القطاعات تطورا في الارباح يصل لها معامل الربحيه الى 30، وشركات الاتصالات يصل الى ما بين 20 الى 25، وشركات الخدمات الى 15، والعقار 10 تقريبا، والاستثمار بين 5 و 12.
طبعا كل ما قل معامل الربحيه للسهم يعتبر رخيص.
3. حجم النمو احيانا تجد شركه جديده نسبيا وارباحها قليله و توزيعاتها قليله او ما توزع فلوس، بس زيادة راس مال، ومع ذلك يصعد سهمها لان تنمو وتزيد ارباحها، مثل الوطنيه للاتصالات، ومجموعة المشاريع غالبا.
4. قيادة الشركه، اذكر اول تعريف قالي عنه صديق هناك شركات نظيفه كالهواتف وشركات غير نظيفه كمعظم شركات الاستثمار، طبعا قيادة الشركه تعطي قوة دفع لزيادة سعر السهم، فالثقه موجوده في السهم، لان قيادة الشركه لا تنقل اشاعات ولا تلعب في ملكياتها في حال استجداد الاخبار السيئه او الجيده.
5. الدوره الاقتصاديه، طبعا هناك دوره اقتصاديه، ترتفع بها اسعار الاسهم في هذه الفتره يرتفع متوسط اسعار الاسهم ويكون بالاصل السهم متضخم، ولكنه فعليا غير متضخم نسبة الى باقي اسهم السوق او الاسواق المجاوره.
6. سعر السوق الى سعر قيمة السهم الدفتريه، اذا كان سعر السوق اقل من القيمه الدفتريه فهذا يعني ان السهم رخيص جدا (اعتقد سعر سهم شركة التمدين اقل من سعر القيمه الدفتريه) وهذي حاله صعبة الوجود وبالعاده يكون سعر السوق اكبر بضعفين او 3 اضعاف عن السعر الدفتري، لان السعر الدفتري يتغير بعد حسابات الارباح والتوزيعات وغيرها.

طبعا هذا شي قليل وهو كل اللي اعرفه عن قيمة السهم العادله، وهناك الكثير الكثير اللي تعتمد عليه الشركات الاستثماريه والصناديق والمحافظ الكبيره.

وياليت يفيدونا اكثر الاخوه المحللين الاساسيين

[ضربة حظ]

شكرا يا المسبار:10:
بس انا شفت احد الاعضاء يحسب قيمة السهم يقولك مثلا
ارباح 33 لثلاث ارباع وسعر السهم 300 يكوون ممتاز؟؟!!
ويصير التخمين 44 فلس للربع الرابع
لان 33 %3 =11
11*4=44ارباح الرابع تقريبا
44*10 =440
ما ادري شنو 10 وليش هالحسبة؟؟
انا ذكرت طريقة الحساب فقط للعضو (الارقام كمثال)
وهذا السؤال للفايدهوانا مضيع الموضوع الي فيه طريقة الحسبة!!

[المسبار]

شكرا يا المسبار:10:
بس انا شفت احد الاعضاء يحسب قيمة السهم يقولك مثلا
ارباح 33 لثلاث ارباع وسعر السهم 300 يكوون ممتاز؟؟!!
ويصير التخمين 44 فلس للربع الرابع
لان 33 %3 =11
11*4=44ارباح الرابع تقريبا
44*10 =440
ما ادري شنو 10 وليش هالحسبة؟؟
انا ذكرت طريقة الحساب فقط للعضو (الارقام كمثال)
وهذا السؤال للفايدهوانا مضيع الموضوع الي فيه طريقة الحسبة!!



اي
الطريقه هذي هي رقم 2 اللي قلتها فوق وهو معامل الربحيه.
مثلا قال 9 شهور 33 فلس، يعني توقع 11 فلس كل ربع، صح ؟
فقال الربع الاخير بعد 11 فلس، صار المجموع 44 فلس.
قام وضربها بمعامل ربحيه = 10
فطلع وياه الناتج 44*10 = 440 فلس.

معامل الربحيه يفرق في كل قطاع
وهم ماني قايل

[(المستثمر)]

شكرا لكم جميعا على الاجوبه المفيده الله لايحرمكم الاجر ان شاء الله